Երեկ լիմոնով կրեմ, իսկ այսօր կարկանդակի (պիռոգի) խմոր: Իմ ամենասիրելի ուտելիքներից են, քանի որ բավականին երկար կարող են դիմանալ սառնարանում և սպասել հարմար առիթի:
Հեշտ պատրաստվող խմոր, որը կփրկի բոլոր դեպքերում: Սա իտալական տարտերի խմոր է, որը կարելի է պատրաստել հենց սեղանին` առանց որևէ աման: Գիտեմ ռիսկային է թվում, բայց ես փորձել եմ ու ասեմ, որ խոհանոցը դեռևս կենդանի է մնացել 🙂 Համ էլ, նման պատրաստման եղանակը + Կառուզոն թույլ կտա քեզ զգալ իսկական իտալացի, ով իր ֆերմայում կարկանդակ է պատրաստում, որպեսզի երեկոյան հյուրերի հետ վայելի…լավ չխորանամ: Արեք, ինչպես հարմար կլինի:
Խմորի համար մեզ պետք է`
300 գ ալյուր
150 գ շաքարավազ
100 գ կարագ (կամ սփռեդ)
1 թգ աղ
1 թգ խմորի փխրեցուցիչ
1 փգ վանիլլի փոշի կամ էքստրակտ
մեկ լիմոնի կեղև
1 թգ լիկյոր կամ ռոմ
Սեղանին լցրեք ալյուրի կեսն ու ավելացրեք սենյակային ջերմաստիճանի փափուկ կարագը կամ սփռեդը: Ավելացրեք շաքարավազը, աղն ու փխրեցուցիչը: Մի թեթև հունցեք ու ավելացրեք լիմոնի կեղևն ու ալյուրի մնացորդն ու ռոմը: Եթե խմորը դեռ կպնում է ձեր ձեռքերին, ապա մի փոքր էլ ավելացրեք: Շարունակեք հունցել, մինչև չստանաք պինդ խմորի գունդ: Մի փոքր տափակացրեք այն , դրեք ալյուրոտ տոպրակի մեջ ու տեղափոխեք սառնարանի ամենասառը հատվածը: Մեկ ժամից կարող եք արդեն օգտագործել կարկանդակների, մրգային տարտերի կամ պեչենիների համար:
Խմորի մնացորդը կարող եք պահել մինչև 3 շաբաթ:
Լիմոնե կարկանդակ ստանալու համար վերցրեք խմորը, գրդնակեք ու տեղավորեք հրակայուն ափսեյի մեջ: Վրան փռեք խմորեղենի թուղթ ու լոբիներ, կամ մակարոն: Սա պետք է նրա համար, որպեսզի խմորը վառարանում ձևափոխությունների չենթարկվի: Եվ այսպես վերցնում ենք ծայրից ծայր մակարոններով լցոնված ծմորն ու դնում վառարանը :30-40 րոպեն բավական են, որպեսզի խմորը մի փոքր կարմրի:
Պետք չէ, որ խմորը շատ չորանա: Հանեք այն վառարանից ու թողեք մի փոքր սառի, այնուհետև ավելացրեք լիմոնի կրեմն ու կրկին տեղափոխեք վառարան: Եթե լիմոնի կրեմը ջրիկ է, մի վախեցեք` 30 րոպեյից հետո այն կպնդանա: Լիմոնի պիռոգը վառարանից հանելուց հետո թողեք, որպեսզի այն սառչի: Հարեք երեք սպիտակուց կես բաժակ շաքարավազի հետ մինչև պնդանալն ու լցրեք լիմոնի կրեմի վրա: Գեղեցիկ նախշեր արեք ու վերադարձրեք պիռոգը վառարան ևս 20 րոպեով, կամ, մինչև մեր սպիտակուցը (մերենգը) գույնը փոխի:
Վերջ: Պիռոգը պատրաստ է . վայելեք 🙂
Եթե պատրաստեք այն, չմոռանաք ուղարկել լուսանկարը Նյամ Բլոգին .
Սիրով`
Նյամիկ Էլլա Կանեգարիան