Գարունը. բացի անհասկանալի եղանակային փոփոխություններից ու անկառավարելի անձրևների պոռթկումից այլ բաներ էլ ունի` թարմ կանաչի, բանջարեղեն: Կարծում եմ հիանալի ժամանակ է սկսել զբաղվել իտալական խոհանոցի ուսումնասիրմամբ: Ի դեպ գարնան դրական կողմերից նաև այն է, որ կարելի է զբոսնել ու վերացնել համեղագույն, բայց ոչ դիետիկ իտալական ուտեստներից ստացված կալորիաները 🙂
Իհարկե սովորաբար ընդունված է սկսել սկզբից (տաֆտոլոգիա), բայց եկեք բաց թողնենք սկիզբն ու ոգեշնչվելու համար սկսենք ոչ թե առանձին պաստայից կամ սոուսից, այլ շատ համեղ, հյութալի լազանյայի բաղադրատոմսից:
Դուք կզարմանաք, թե որքան քիչ է պետք այս համեղ լազանյայի պատրաստման համար: Ի դեպ այն շատ գարնանային է ու առանց միս:
Մեզ հարվավոր է
պաստայի խմորը պատրաստելու համար`
4 բաժակ ալյուր
4-5 ձու
Կես թգ աղ
լցոնման համար`
100 գր տոմատի մածուկ
4 լոլիկ
2 կանաչ սխտոր
1 գլուխ սոխ
5 գդ թարմ, կտրատած ռեհան
Սովորաբար այս բաղադրատոմսում օգտագործում են ռիկոտտա և մոցառելլա, բայց էկոնոմիայի տեսանկյունից վնասակիր այս բաղադրիչները կարելի է փոխարինել (թող ներեն մեզ իտալացիները): Ես օգտագործում եմ տեղական արտադրության գաուդայի համով պանիր (փնտրեք սուպերմարկետներում), տեղական մոցցառելլա և չեդդեր: 70-100 գրամը բավական է, եթե ուզում եք լազանյան լինի թեթև ու բարակ (իտալերեն magro), իսկ եթե նախընտրում եք ավելի յուղային ու հաստ, խնդիր չկա` 300 գրամը նույնպես լավ է:
Դե ինչ, անցնենք խմորի պատրաստմանը: Պահպանելով մեր իտալական կարկանդակի խմորի լավագույն ավանդույթները, առաջարկում եմ այն պատրաստել առանց ամանի` սեղանի վրա: Եթե նախորդ անգամ հենց այդպես էլ արել եք, ուրեմն կհասկանաք, թե որքան հաճելի է դա: Իհարկե հուսով եմ հավեսի չեք ընկել ու առհասարակ հրաժարվել ափսեներից 🙂
Լցնում ենք ողջ ալյուրը սեղանին, մի փոքր փոսիկ բացում և վրան ջարդում 2 ձու, ավելացնում աղը: Հունցում ենք մասսան, մինչև այն միանա, ընթացքում ավելացնում ենք մնացած ձուն, այնքան, մինչև խմորն ամբողջությամբ չմիախառնվի ու կպնի: Տեղափոխեք պատրաստի խմորը թեթև ալյուրոտած մթերային ցելլոֆանի մեջ ու դրեք սառնարանում: 30 րոպեյից ձեր խմորն արդեն ի վիճակի կլինի դիմանալ գրդնակին:
Հանում ենք խմորը, գրդնակում ու կտրում մոտ 3 մմ հաստության ու 30 սմ երկարության կտորներ (կամ չափեք ձեր հրակայուն ամանն ու հարմարեցրեք խմորի չափը դրա հետ): Եռացնում ենք ջուրը մեծ կաթսայում և ուղիղ 30 վայրկյանով գցում խմորիկները դրա մեջ, հետո հանում ենք ու տեղափոխում սառը ջրի մեջ 2 րոպեյով: Դրանից հետո դնում ենք լազանյայի խմորի կտորները չոր սրբիչի վրա և թողնում չորանան:
Ժամանակն է տաքացնել վառարանը 150 աստիճանով և անցնել լցոնման պատրաստմանը:
Թավայի վրա լցրեք 3 գդալ ձեթ և մանր կտրատված սոխը: Մի քանի վայրկյանից ավելացրեք թարմ, կանաչ , մանր կտրատված սխտորն ու կիսակլոր կտրված լոլիկները (լավագույն համը ստանալու համար խորհուրդ եմ տալիս գնել լոլիկ ոչ թե սուպերմարկետից, այլ որևէ շուկայից ու նախապես համոզվել, որ այն քաղցր է):
Մեզ պետք են թեթևակի կարմրած, բայց ոչ չորացած սոխեր, հիշեք դա ու չձգեք պատրաստման հետ: Իսկ հիմա վերցրեք տոմատի մածուկն ու մի երկու կաթիլ զեյթունի ձեթ, 3 թգ ջուր ավելացրեք դրան նաև աղ, բիբար ըստ ճաշակի: Ավելի հետաքրքիր համ ստանալու համար կօգնի չորացրած կանաչին, հատկապես ծիտրոնը: Եվ այսպես, միջուկը պատրաստ է, լազանյայի պաստան պատրաստ է…անցնենք առաջ:
Մի փոքր կարագ քսեք հրակայուն ամանի մեջ ու շարեք վրան լազանյայի պաստան: Համոզվեք, որ մեր խմորիկները փակում են ամանի հատակն ու ոչ մի անկյուն բաց չեն թողնի: Հիմա ավելացնում ենք վրան լցոնումը, զգուշորեն քսելով բոլոր ծայրերին ու ոչ մի բաց տարածություն չթողնելով: Հիմա ավելացնում ենք մեր երեք պանիրներն ու վրայից լցնում մածուկային սոուսը: Վերջ, հիմա դնում ենք երկրորդ շերտն ու նույնը կրկնում ենք երկրորդ շերտի հետ: Հիմա արդեն իսկապես Վերջ, տեղափոխում ենք վառարան 20-30 րոպեով:
Հանում ենք վառարանից և վայելում չոր գինու հետ ու ոնց ասում են` Buon appetito!
Մինչ նոր իտալական ուտեստ`
Էլլա Կանեգարիան