Իմ սառնարանում կարկանդակի խմորները երկար կյանք չեն ունենում` դրանք անպայման գտնում են իրենց համար որևէ, երբեմն ոչ ադեկվատ լցոնում, ու դառնում նոր կարկանդակ, որը դեռ պետք է համտեսել ու որոշել սա մեր վերջին հանդիպումն է թե ոչ:
Վերջերս լսեցի մեկ ռեցեպտ, որը համատեղելով իմ` սառնարանում անգործ մնացած խմորի հետ ստացա շաաատ համեղ ամառային դեսերտ:
Այս համով դեսերտի համար մեզ պետք է`
Խմորի համար
պատրաստում ենք իմ սիրած իտալական կարկանդակի խմորը, որի համար պետք է
300 գ ալյուր
150 գ շաքարավազ
100 գ կարագ (կամ սփռեդ)
1 թգ աղ
1 թգ խմորի փխրեցուցիչ
1 փգ վանիլլի փոշի կամ էքստրակտ
մեկ լիմոնի կեղև
1 թգ լիկյոր կամ ռոմ
Լցոնման համար`
1 տուփ կաթնաշոռ (կարող եք վերցնել նաև յուղազրկված կաթնաշոռ)
1 տուփ սերուծք
5 թգ կակաո
1 ճգ գետնանուշ
15 գր դառը շոկոլադ (80%)
Մրգային սիրոպի
կես բաժակ կեռաս (թարմ կամ սառեցված)
կես բաժակ շաքարավազ
1 բաժակ ջուր
Պատրաստման եղանակը շատ հեշտ է`
Իտալական տարտը պատրաստելու համար նայեք այս պոստը Ինչպես պատրաստել իտալական կարկանդակի խմոր:
Եթե զգում եք, որ խմոր պատրաստելու հավես չունեք (անկեղծ ասեք` ոչ ոք ձեզ չի մեղադրի այս շոգին), ապա օգտվեք այս տարբերակից:
Խմոր պատրաստելու հավես չունեք?
վերցրեք 1-2 բաժակ սովորական վարսակ (օվսյանկա), մի փոքր տաքացրեք թավայի վրա, հետո տեղափոխեք ցելլոֆանի մեջ: Ավելացրեք դրան գետնանուշն ու գրդնակով խփեք դրանց այնքան, մինչև չմանրանան: Ալյուր պետք մի ստանալ, մի թեթև մանրացրեք ու վերջ: Հիմա այս բոլորը տեղափոխեք տորթի ամանի մեջ, ավելացրեք հալած մարգարին կամ կարագ ու մատներով սղմեք ափսեյին, մինչև չստանաք համասեռ, իրար կպած զանգված` սա կլինի մեր խմորի փոխարինողը: Վրան ավելացրեք մի փոքր մանրեցված շոկոլադ:
Անցնենք լցոնմանը
Միքսերով հարեք սերուծքն ու կաթնաշոռը, ավելացրեք վանիլն ու կակաոն: Խառնեք այնքան, մինչև լուծույքը չպնդանա: Լցնելուց առաջ խմորի հատակում մանրեցված գետնանուշ դրեք ու ցանեք վրան կակաոյի փոշի: Հիմա լցրեք լուծույթը ու տեղափոխեք այն սառնարան 4-5 ժամով, կամ մինչև առավոտ: Կարող եք լցոնմանը մի փոքր անուշաբույր լիկյոր ավելացնեք` ոչ ոքի չեմ ասի 😉
Մի մոռացեք սիրոպի մասին
Կեռասը, ջուրն ու շաքարավազը դնում ենք մարմանդ կրակին: Անընդհատ խառնում ենք լուծույթն ու անջատում այն ժամանակ, երբ լուծույթը մի փոքր պնդանա` մոտ 7-9 րոպեյից: Կարող եք շաքարավազը մի փոքր ավելացնել, եթե քաղցրակեր եք:
Մատուցելուց առաջ վրան ավելացրեք կակաո ու մանրեցված շոկոլադե հատիկներ ու իհարկե մրգային սիրոպը:
Ստացվում է շատ համեղ, նուրբ համ ունեցող ու ամենակարևորը` սառը դեսերտ, որը հեշտ է տարբեր ձևափոխումների ենթարկելով նորի տեղ անց կացնել:)
Սիրով`
Նյամիկ Էլլա Կանեգարիան
Նյամ Բլոգ 